佛山食玩瞓大陸旅行會喺3月9日（星期日）至3月10日（星期一）舉行，行程係兩日一夜。先講集合地點，當日嘅集合時間及地點有兩個，分別係：早上7點10分喺九龍塘港鐵站往黃埔方向車尾位置等，又或者係早上8點10分喺落馬洲港鐵站出閘位置等，記住兩個集合地點都係逾時不候架。

第一日行程：集合晒會員義工之後就會過關，我地會準時早上9點15分同旅行社匯合，之後就會由福田口岸出發去佛山食午餐，午餐有《金獎黑金叉燒+巧手生焗遊龍斑宴》，食飽之後會去《嶺南新天地》，喺嗰度我地會睇簡氏別墅、嫁娶屋、孔廟、李眾勝堂祖鋪，鑊耳牆、青磚屋、石板路、雕花屋簷、蜿蜒街巷等。行完街之後就會出發去廣東三大隗寶之一嘅《佛山祖廟》參觀，重會觀看精彩嘅嶺南舞獅表演。參觀完之後，我地就會入住2023年全新開業嘅《希爾頓惠庭酒店》同埋食酒店嘅自助晚餐，晚餐之後就係大家嘅自由時間啦。

第二日行程：朝早起身之後，大家會喺酒店慢慢嘆個自助早餐先。之後大約早上11點就會離開酒店繼續行程。我地會直接出發去番禺食個午餐先，午餐係《鼎盛私廚粥底火鍋宴》，然後會同大家去行古色古香嘅《沙灣古鎮》。行完街就上車休息下，準備返深圳關口過關。

收費方面，會員及同行者每位$640元，以上費用已經包括團費及保險費。另外，每位參加者須要額外俾港幣$160嘅內地導遊服務費，通常導遊會喺第二日回程時同大家收取嘅。

麻煩各位參加者主動聯絡阿彬、Annie或者善善，講低你哋想點分房，同埋你哋想同邊d朋友仔同一張枱食飯，另外講聲俾大家知內地一張枱係坐10個人既。

最後，過關需要香港身分證同埋回鄉證，請睇清楚自己嘅回鄉卡有無過期，同埋如果大家想穩陣d既話，喺活動當日俾埋個回鄉卡副本俾我地，因為萬一喺內地遺失回鄉卡嘅話，有回鄉卡副本喺手，補領手續會比較容易。至於怕暈車浪嘅朋友，要記得帶暈浪丸呀~ 最後，由於國內嘅酒店唔一定會提供即用即棄用品 (除左廁紙)，所以大家請自備個人衛生用品(如個人清潔用品、梳洗用品、拖鞋等)。

有關佛山食玩瞓活動的繳費方法，請留意下一則通告。

而阿彬當日嘅活動電話喺9512 0403、Annie 當日嘅活動電話喺6644 2214、善善當日嘅活動電話喺5682 3308。

如有查詢可以致電2760 0100與服務中心職員阿彬、Annie或善善聯絡。