公益少年團同學同你一齊玩新興運動「布袋球」，布袋球，英文名CORNHOLE，又稱沙包洞，係一種美州新興嘅拋擲性運動。據說起源於14世紀嘅德國，適合所有年齡層人士，遊戲通常以錦標賽的形式進行。
長沙灣中聖書院公益少年團於2025年1月20日（星期一），將會舉辦義工服務，由14位中學同學帶領各位會員一齊體驗布袋球運動，仲可以組隊玩下比賽添！

呢班同學早前更特意參加咗由協進會提供嘅公眾教育工作坊，學習正確領路法及口述影像基本技巧，務求活動過程中可以安全地同視障朋友體驗遊戲。如果你平時都鐘意試新嘢，體能上能應付簡單拋擲動作，同時有興趣支持一下一班想做義工嘅中學同學仔，就一定唔好錯過本活動喇。

希望會員朋友除咗作為參加者之外，都可以為一眾義工同學仔帶來寶貴嘅與視障人士相處經驗，一齊推廣共融意識，如果義工同學們有任何需要包涵之處，亦希望參加嘅會員朋友提供友善意見，讓大家一齊進步。
本活動詳情如下，日期：2025年1月20日（星期一），
集合時間：下午四時十五分於觀塘職教中心集合，與同學簡單互相認識後將一同步行前往基督教家庭服務中心進行活動，活動大約下午五時三十分完結，
名額：8個，如報名人數超出名額，將會進行抽籤，
費用全免，有興趣嘅會員可以於1月14日或之前致電3615 1045報名，抽籤結果會於1月16日熱線中公布。