平時聯區活動，我哋通常都係一齊睇戲、食飯、聚吓咁樣。趁住仲係春天嘅尾巴，不如一齊去戶外輕鬆吓，又可以同唔同分區嘅會員交流聯誼。
今次活動，我哋打算一齊去馬灣，感受一下當地悠閒嘅氣氛。講到馬灣，大家係咪第一時間就諗起「挪亞方舟主題公園」呢？不過今次我哋主要唔係去嗰度。
馬灣1868彩虹村莊由舊村屋改建而成，外牆粉刷成色彩繽紛嘅小屋，感覺就好似意大利五漁村一樣。園區仲邀請咗多位本地同國際壁畫藝術家，創作大型特色壁畫，唔單止打卡影相一流，仲可以欣賞到馬灣獨有嘅文化氛圍。

如果想參加呢個活動嘅話就要留意以下詳情啦，活動日期係4月29日（星期三），活動時間係朝早11:30至下晝大約4:30，參加者可以選擇喺朝早10:45喺太子地鐵站月台往荃灣方向車頭位置集合，或者11:15喺青衣港鐵站A出口（第一個英文字母）出閘位置集合。我哋集合完之後，會去位於青衣城一期嘅炑八韓烤午餐，餐點方面，大家可以揀選以下嘅套餐，A. 石頭牛肉飯、B鐵板芝士韓式牛仔骨飯或者粉絲、C. 石頭蔥蒜鰻魚飯、D. 海鮮豆腐湯拼紫菜飯、E. 人蔘雞湯（半隻）拼紫菜飯、F. 牛肋骨煲拼紫菜飯、G. 部隊鍋拉麵，H. 牛骨餃子湯，餐飲已包括凍水果茶或凍檸檬茶。
食完之後就會轉乘巴士NR330前往馬灣遊覽。我哋會喺下午4:00搭返巴士返青衣港鐵站解散。

本次活動名額共46位，九龍東分區14位，九龍西分區、新界東分區、新界西同港島分區分別有8位。收費方面，基本及贊助會員70元，同行者135元，非會員210元。
有興趣嘅各分區會員可以係4月17日(星期五)下午3點至4月22日(星期三)下午3點，致電或者WhatsApp報名熱線2760-1162報名，每通電話可報2個人，如果報名人數多過名額，活動就會進行抽籤，抽籤結果將會係4月23日(星期四)嘅熱線中公佈。

如有任何查詢，歡迎致電2760-0100與服務中心職員阿Sa聯絡。