各位會員朋友，今次熱線教你點由何文田地鐵站黎到服務中心。
要係地鐵站黎服務中心需要經過四個部分，首先第一部份係由月台坐升降機到大堂出閘位，第二部份係由大堂出閘位坐升降機去A3出入口既行人天橋，第三部份係由地鐵A3出入口行人天橋去到接駁愛民邨既天橋升降機，最後一部份就係由愛民邨升降機行到去服務中心。
第一部份我地會教大家點由月台去到大堂出閘位。首先簡單介紹吓何文田站嘅月台位置分布，觀塘綫月台位於最底層嘅L7 ，但係往黃埔方向同往調景嶺方向嘅月台係唔相通嘅，需要去返L6轉車大堂先可以轉線，而屯馬綫月台就係打對面位於L4，大堂位於L2，而無論你喺觀塘綫定屯馬綫要搭升降機嘅話都係共用兩部升降機，呢兩部升降機都係比較接近B出口出閘位。
我哋會先講觀塘線兩個月台，再講屯馬綫。
觀塘線
如果大家搭觀塘綫嚟何文田，無論你係邊個方向嚟，升降機都喺第五卡第一個門嘅位置，入咗升降機後需要按突起警鐘制下第一個制，即係L2字，就可以直上大堂。
如果想搭扶手電梯嘅話，往黃埔方向，不論車頭定車尾都會有向上嘅扶手電梯，往調景嶺方向就係只有車頭才有扶手電梯，而且都係要上四堂扶手電梯先可以去到大堂閘機果層。因為比較複雜，我地比較建議用升降機。
出左升降機後沿引路徑左轉會有一條直行嘅引路徑，如果要去洗手間嘅會員，可以留意往右手邊嘅引路徑會去暢通易達洗手間，如果冇需要去洗手間嘅就無需理會任何引路徑常嘅分支，一路沿引路徑直行，就可以去到閘機。通常喺服務中心嘅活動我哋都會安排義工喺嗰度接大家，而呢個位置係比較接近B出口，就係出咗閘嘅右手邊，但係通常活動嘅集合地點會係A出口，大家只係需要出咗閘之後繼續向前行就會到。
屯馬線
如果坐屯馬綫嘅會員，我哋會建議大家去到往烏溪沙方向車尾(即往屯門方向車頭) 第八卡第三第四道門就會有扶手電梯，需要上兩段扶手電梯，就會到B出口出閘機。
如果想坐升降機，屯馬線月台近中間位置會有兩架𨋢，但因為架𨋢係落埋觀塘線，都比較繁忙，大家可能會等得比較耐。雖然話屯馬綫個月台係相通，不過中間其實有啲位係要兜大圈先至去到對面月台嘅，如果搭升降機嘅朋友，往烏溪沙方向嘅話升降機會喺第七卡第一道門，往屯門方向嘅話升降機會喺第四卡第一道門。
同觀塘線一樣，出左升降機後沿引路徑左轉會有一條直行嘅引路徑，如果要去洗手間嘅會員，可以留意往右手邊嘅引路徑會去暢通易達洗手間，如果冇需要去洗手間嘅就無需理會任何引路徑常嘅分支，一路直行，就可以去到閘機。通常喺服務中心嘅活動我哋都會安排義工喺嗰度接大家，而呢個位置係比較接近B出口，就係出咗閘嘅右手邊，但係通常活動嘅集合地點會係A出口，大家只係需要出咗閘之後繼續向前行就會到。

第二部份我地會教大家點由閘機去到A3出口行人天橋。比定個tips大家，黎中心通常都係要轉左嘅。
出左B出口閘機後，向十二點方向直行，左手邊分別會經過客務中心、A出口嘅出閘機同美心西餅。直行當聽到前方有扶手電梯聲音，左手邊聲音較密集果條就係向上通往A出口嘅長扶手電梯，而右手邊就係向下嘅。如果選擇唔用扶手電梯用升降機，就可以繼續往左面沿住引路徑行到升降機，前面十二點方向就係OK便利店，搵到條引路徑向左轉，就可以向A3方向繼續行啦。大家可以沿住引路徑一直行約3至5分鐘，當有分叉位時沿住引路徑繼續靠左，一直行到感覺微微向上斜，就到左三部升降機可以上A3行人天橋。
三部升降機都可以上到行人天橋，只要入到升降機禁突起警鐘以下嘅第一個制，就可以去到最高個層，即係U3，聽住升降機嘅廣播，就可以到達A3行人天橋嘅出口，留意千祈唔好出左忠孝街個層啊。
而下一條通告會介紹由地鐵A3行人天橋去到服務中心。如果仍然對路線有唔清楚既地方，歡迎致電2760-0100同服務中心職員聯絡。