各位會員大家好！唔知大家有無玩過高爾夫球呢，平時大家可能比較有少有機會試玩這項運動，嚟緊會有由康文署主辦，本會協辦嘅高爾夫球同樂日，比大家體驗下高爾夫球嘅玩法同埋樂趣。

活動會係2026年1月21號(星期三)舉行，活動時間係下午2點至下午4點，地點喺屯門龍門路54號嘅屯門康樂體育中心。活動費用全免，歡迎本會嘅基本會員參加。參加者需要係活動當日下午12點45分，係黃大仙港鐵站D出口(即係第4個英文字母)出閘位集合。 我地會乘搭旅遊巴前往屯門康樂體育中心，而活動完咗之後，就會搭返旅遊巴返黃大仙港鐵站解散。

有興趣嘅基本會員可以係12月27日(星期六)下午3點至1月6日(星期二)下午3點，致電報名熱線2760-1162報名，每通電話可報1個人。名額12個，如果報名人數多過名額，活動就會進行抽籤，抽籤結果將會係1月8日(星期四)嘅熱線中公佈。

如有任何查詢，歡迎致電2760-0100與服務中心職員阿Sa聯絡。