各位會員，大家好，我係職教中心諮詢委員會候選人13號許頌康，過去10年裏面，我經歷過無數次嘅面試失敗，曾經覺得自己好差好無助，但因為機構令到我重新搵到工作，所以今日我都好希望趁自己仲有視力，有能力去回饋翻機構，幫助到更加多唔同嘅會員。我相信我哋可以做嘅嘢，遠比我哋想象之中更加多。我哋可以成為美食家，用我哋嘅嗅覺，我哋嘅味覺，同唔同嘅餐飲去合作，幫佢哋寫一啲文章。我哋可以成為一個防災嘅導師，帶領火警演習，將安全教育做成一個服務推廣到學校啦，同埋企業入面。聲音同埋表達力係我哋嘅強項之一啦，我哋亦都可以成為一個司儀或者主持，例如婚禮嘅司儀、推廣員啦、導賞嘅講座。用耳仔聆聽亦都係我哋嘅優勢之一啦，我哋亦都可以用我哋嘅耳仔去成為一個輔導員，專業嘅朋輩支援員。亦都有一個可能性，我哋可以同唔同嘅服裝品牌合作，打造一啲屬於視障人士嘅時尚品牌，可以好多視障人士成為一個model，可以改善到我哋嘅社會印象。銀髮族係好有潛力，我哋嘅銀髮族嘅朋友仔亦都可以成為真人圖書館，人生嘅導賞員，將佢哋嘅經驗變成一個課程，甚至銷俾其他嘅機構。依家係一個AI嘅時代，AI依家只係個起點，我哋如果繼續努力去學習，其實我哋係有機會更加叻過健視人士，喺就業上面，我哋可以成為一個優勢嚟嘅。我以上講嘅想法未必百分百能夠實現，但係我希望大家可以一齊去繼續諗，一齊去繼續嘗試，一齊去改變呢個界別。我係13號許頌康，請大家投我一票。多謝。