各位會員，大家好呀，我叫錢蓉玲，係職教中心諮詢委員會嘅候選人，我嘅編號係7號。 我係一位視障加聽障嘅人士，但係我無為自己設限，我已經擁有超過8年嘅企業培訓經驗，曾經喺大中小企業協助公司有系統地培訓翻我哋嘅員工，提升翻我哋員工嘅專業能力，適應公司嘅新發展。另外我亦都喺大學培訓一啲生力軍，等佢哋掌握到職場嘅common sense。除左呢一啲工作之外，我亦都曾經喺本地嘅NGO啦推行過世界衞生組織嘅ICF框架，呢種經歷令我深深咁體會到，即使我哋有相同嘅殘疾，每個人都會因應環境同埋心理因素，喺學習同埋工作上嘅發展，都會有唔同嘅需要。我亦都係SEN嘅培訓導師同埋研究員，而家就係協助緊香港教育大學聯同唔同嘅持份者去共同探討一啲殘疾人士就業的痛點啦，致力去爭取更加多嘅機會，無論係職業培訓，定係就業機會，我哋都有一啲相關嘅討論，去倡議翻俾唔同嘅parties，過去呢，我曾經喺立法會，香港人力資源管理學會，同埋ERB等等嘅機構去倡議返共融職場，同埋職業培訓嘅平等機會嘅。我深信呢一啲平等機會係我地殘疾人士喺社會裏面被看見被肯定，同埋實現向上流動嘅重要一步嚟嘅，如果我有幸當選嘅話，我希望可以將自己嘅專業知識同埋我嘅實踐經驗，去帶入返去委員會，推動翻一個更共融，更具前瞻性嘅一啲措施，等我哋職教中心可以促進返會員嘅發展，做到人人有機會發展所長，最後，懇請大家喺9月11號投票日，用電話投票我7號候選人錢蓉玲，多謝大家。