大家好，我叫鄭惠文，我係職教中心諮詢委員會選舉入面嘅其中一位參選人，我嘅參選號碼係2號。 我係2024年加入協進會，我早年因為工作意外嘅緣故，令到雙眼視力受損，現時嘅視力大概有兩至到三成。雖然我加入協進會嘅時間並唔長，但係作為一個長期喺香港生活嘅視障人士，我深深體會到協進會喺視障界別扮演住嘅角色係尤其重要。所以我希望能夠參與中諮會，可以能夠為協進會，為大家出多一分力。雖然現時我受到身體嘅限制，但係我過往曾經喺公營同私營機構工作。所以我有豐富嘅溝通合作，同埋執行力。 如果我有幸能夠成為中諮會嘅一份子，我希望能夠推動到科技共融。所謂嘅科技共融，即係令到一班會員，一班視障人士可以有更多機會去接觸到科技，而接觸科技能夠改善到我哋嘅生活，甚至可以協助我哋搵工。當然我相信單靠我哋一個機構嘅力量並唔足夠，所以我亦都會建議多啲去同其他外界嘅機構聯繫，爭取合作嘅機會，咁樣可以提升到我哋會員嘅生活質素以及工作機會。如果你同我都有類似或者相同嘅諗法嘅話，咁你可以投我一票，等我可以成為中諮會嘅成員。最後再次提醒大家，我嘅參選編號係2號，多謝。