各位會員，大家好，我係執委會財務秘書候選人，12號何睿知。股神巴菲特曾經講過，當潮退嘅時候，你就知道邊一個人冇著泳褲。過去幾年，本會曾經經歷大額嘅財政盈餘，大額嘅赤字，但係我哋對內嘅服務，對公共政策嘅影響力絲毫未減，證明我哋條泳褲著得好實，亦都有賴會員同埋職員喺當中嘅努力。眼觀現在政府削Budget，經濟不景，我唔會對未來兩年嘅財政狀況盲目樂觀。具體而言，我有以下3個策略，提升本會嘅底子，抵禦未來嘅風浪。第一，我將會同傳訊團隊緊密合作，拓闊捐款者嘅基礎，讓更加多嘅會員義工同埋家屬，好似我咁加入成為協進之友月捐嘅行列，亦都提升本會嘅品牌形象，讓企業要捐款，要扣稅嘅時候第一個諗起我哋。第二提升社企產品嘅質素，特別係喺我哋有優勢嘅產業，例如係無障礙網頁測試或者無障礙顧問服務等等，讓企業喺進行採購或者需要滿足有關法例嘅要求嘅時候，亦都會諗起我哋。第三，提升跨單位協作嘅文化，讓會員、職員、義工，不同專業同埋資源喺單位之間流動，促進協同效益，亦都減省無謂嘅支出。我相信只要我哋群策群力，一定能夠壯大本會嘅底子，迎向更大嘅風浪。請大家支持我，12號何睿知，繼續為協進會睇住盤數，做靚盤數，多謝大家。