大家好，我係非指定職位候選人8號廖子康。作為香港失明人協進會執行委員會嘅候選人，我致力於利用我嘅科技知識，同埋熱情推動科技無障礙發展。提升視障人士嘅生活質素，同埋社會參與機會。以下，係我喺科技無障礙領域嘅一啲工作計劃，首先我會監察本會自行開發嘅應用程式，究竟係咪能夠跟得上科技嘅發展步伐？我會同會員收集意見，針對過時嘅功能提出改善方案，亦會對本會自行開發嘅應用程式作出全面嘅檢討，了解佢哋嘅功能究竟係咪符合當前視障人士嘅需求咧？對於本會自行開發嘅應用程式，我亦希望同專業嘅開發者合作更新應用程式嘅介面，同埋技術架構，提升其兼容性同埋易用性，例如支援最新嘅屏幕閱讀軟件同埋操作係統，跟住喺權益倡議方面，我會定期檢視本地主要公共服務平台，熱門消閑娛樂平台網站，同埋手機應用程式嘅無障礙程度，提出改善嘅建議。與此同時，促進無障礙科技創新，鼓勵本地科技嘅公司同埋初創企業，開發針對視障人士需求嘅科技產品同埋服務。我深信科技係打破障礙，促進平等嘅重要工具，我希望憑藉我嘅知識，同大家攜手共建一個更加包容更加無障礙嘅社會。請投我8號廖子康一票，多謝各位。